Policia Kufitare e Vlorës parandalon një rast të tentativës për transfertë të parave në mënyrë të paligjshme. Sekuestrohen 57.000 euro dhe procedohet penalisht poseduesi i tyre, pasi nuk i deklaroi në kufi.
Në Pikën e Kalimit Kufitar në Vlorë, shërbimet e Policisë Kufitare, në bashkëpunim me Drejtorinë e Doganës, pas kontrollit në vijën e dytë të një automjeti me targë gjermane kanë konstatuar të fshehura në brendësi të mjetit dy pako të mbështjella, brenda të cilave kishte një sasi eurosh të padeklaruara në kufi.
Nga verifikimet e mëtejshme rezultoi se në automjet ishin fshehur rreth 57.000 euro. Drejtuesi i mjetit, shtetasi E. P., 29 vjeç, banues në Kukës është shoqëruar drejt Drejtorisë Vendore të Policisë Vlorë dhe në përfundim të veprimeve u procedua penalisht në gjendje të lirë, për veprën penale "Mosdeklarimi në kufi i të hollave dhe sendeve me vlerë".