13:11 / E Hënë, 09 Dhjetor 2019 / indeksADMonline

Meksika, zbulon fushën më të madhe të naftës në 30 vjetët e fundit

Ndërmarrja shtetërore meksikane e naftës “Pemex” tha se kishte zbuluar fushën më të madhe të naftës që nga viti 1987 në juglindje të vendit, me rezerva deri në 500 milionë fuçi.

Zona e madhe Keski në shtetin bregdetar të Tabasco u zbulua disa muaj më parë, me pusin e parë, i cili sot prodhon 4.500 fuçi në ditë, të shpuar në qershor, raporton Reutersi.

“Sipas analizës së informacionit nga pusi dhe të dhënat sizmike nga zona, sot mund të konfirmojmë ekzistencën e një rezervari gjigant rezervat e të cilit janë ekuivalente me 500 milionë fuçi naftë të papërpunuar”, tha drejtori i përgjithshëm i “Pemex”-it, Octavio Romero Oropeza.

Shefi i “Pemex”-it zbuloi gjithashtu planet e zhvillimit për këtë fushë të naftës 34 kilometra katrorë. Deri në 11 puse duhet të shpohen në këtë fushë për të arritur në 69.000 fuçi naftë në ditë dhe 300 milionë metër kub gaz gjatë vitit të ardhshëm.

Deri në vitin 2021, kompania planifikon të arrijë prodhimin në atë fushë prej 110.000 fuqive naftë dhe 410 milionë metër kub gaz natyror në ditë.